Published on: 26/08/2024

Muzhaqi dhe Balluku në Dibër: Programi i kodimit krijon një brez të ri programuesish për përparimin teknologjik të vendit.

Zmadho tekstin Zvogëlo tekstin
Publikim

Ministrja e Shtetit për Rininë dhe Fëmijët Bora Muzhaqi dhe zëvëndëskryeministrja Belinda Balluku ishin në Dibër në një ceremoni për shpërndarjen e certifikatave për 16 të rinj që përfunduan me sukses kursin e programimit në gjuhën Java. Ky kurs, i ofruar falas si pjesë e programit të kodimit të qeverisë shqiptare, u krijua për të pajisur të rinjtë me aftësi të kërkuara në industrinë e teknologjisë dhe për të rritur përfshirjen e tyre në tregun e punës.

Gjatë ceremonisë, Ministrja Muzhaqi theksoi rëndësinë e këtij programi si një hap i rëndësishëm drejt fuqizimit të të rinjve shqiptarë dhe përgatitjes së tyre për sfidat e shekullit të 21-të. Ajo vlerësoi përkushtimin e të rinjve që përfunduan kursin, duke theksuar se aftësitë e fituara në programimin Java do t’u hapin dyert në tregun e punës, si në vend ashtu edhe jashtë vendit.

Ndërsa, zëvëndëskryeministrja Balluku vlerësoi përkushtimin e pjesëmarrësve dhe rolin e qeverisë shqiptare në nxitjen e inovacionit dhe zhvillimit teknologjik.

Pjesëmarrësit e kursit shprehën entuziazmin e tyre për mundësinë e ofruar, duke nënvizuar se përmes këtij kursi ata jo vetëm që fituan njohuri të thella në fushën e programimit, por edhe zhvilluan vetëbesimin e nevojshëm për të konkurruar në një treg global gjithnjë e më konkurrues. Ky kurs, si pjesë e një nisme më të gjerë të qeverisë shqiptare për të nxitur inovacionin dhe zhvillimin teknologjik, synon të krijojë një brez të ri programuesish që do të kontribuojnë në përparimin teknologjik të vendit.

Me përfundimin e këtij kursi, të rinjtë janë tani të pajisur me aftësi që do t’i ndihmojnë të gjejnë punësim në industri të ndryshme të teknologjisë, duke luajtur një rol aktiv në transformimin digjital të Shqipërisë dhe më gjerë.