Published on: 30/01/2025
Fjala e Ministres së Shtetit për Rininë dhe Fëmijët, Bora Muzhaqi, në përurimin e Qendrës Rinore Multifunksionale në Bashkinë Mat.
Ministrja Bora Muzhaqi, fjala e plotë
Përshëndetje,
Sot është një nga ato ditët shumë të bukura, siç tha kryetari Z. Malaj, siç tha edhe Regi, përfaqësuesi i këshillit vendor rinor të Burrelit. Para dy vitesh, ishim me Kryeministrin në atë parkun e bukur të Burrelit dhe Regi bashkë me dy djem të tjerë ngritën duart para Kryeministrit dhe thanë: “Të gjithë po mbajnë me hatër Dibrën, ne në Burrel nuk po mbështetemi mjaftueshëm. Do donim një qendër rinore, por nuk na e kanë bërë realitet”.
Asokohe u kërkova të rinjve: “Nëse ju siguroheni që ta shkruani vetë projektin dhe të vendosni se çfarë do të realizoni, atëherë me siguri do të gjehet mundësia për ta mbështetur një qëndër rinore në Burrel”. Pavarësisht se ky është një investim i konsiderueshëm për Agjencinë Kombëtare të Rinisë, nga ana tjetër, duhet thënë se investimi është i vogël krahasuar me investimet që janë bërë nga Qeveria në këtë zonë. Por ajo që është e rëndësishme nuk është vetëm realizimi i investimit, pasi ai është bërë tashmë, por është që të rinjtë ta përdorin dhe ta shfrytëzojnë maksimalisht qëndrën rinore.
Detyra jonë është të jemi gjithmonë krah të rinjve. Prandaj edhe Regit, përpara se të bënim këtë projekt, bashkë me të gjithë shokët e Këshillit Vendor Rinor, i kërkova që nëse do të bëjmë këtë investim në Burrel, duhet të sigurohemi që çdo ditë të ketë aktivitete rinore këtu. Duhet të ketë të rinj që të rrisin aftësitë e tyre, që të zhvillojnë trajnime, aktivitete argëtuese, duke e përdorur këtë hapsirë të re për të rinjtë e zonës. Për këtë pjesë, jam e bindur që do ta mbani fjalën dhe sigurisht do ta shfrytëzoni këtë hapësirë pas kaq kohësh që e keni kërkuar.
Sot është dita për të festuar dhe për të hartuar një plan pune për të rinjtë, se si doni ta përdorni këtë hapësirë, si ta bëni funksionale për jetën tuaj dhe për krijimin e mundësive në qytetin e Burrelit. Kjo duhet të jetë fokusi, pasi shpesh e kemi mendimin se duhet të shkojmë në Tiranë për të ndjekur studimet, por duhet gjithashtu të mendojmë se si mund të kontribuojmë për qytetin ku kemi lindur, për qytetin ku jetojnë prindërit tanë, dhe secili prej nesh mund të japë një kontribut edhe më të madh.
Kam edhe një lajm të mirë për të rinjtë e Burrelit, dhe jo vetëm. Të rinjtë e dinë që ne premtimet i bëjmë realitet, dhe pavarësisht se na duhet pak kohë nga ana logjistike për t’i realizuar, një nga programet që të rinjtë kanë kërkuar vazhdimisht, është programi i nismave komunitare. Kështu, nëse disa të rinj nga Mati kanë një ide të bukur që duan ta realizojnë, do të mund të aplikoni në Agjencinë Kombëtare të Rinisë dhe të merrni financimin për të realizuar projektin tuaj. Këtë herë, ju vetë mund të merrni iniciativën dhe të bëni ndryshimin për qytetin tuaj. Nëse doni të shtoni libra në bibliotekën tuaj, të krijoni një park të vogël për të rinjtë, ose të bëni ndonjë plotësim me pajisje të mëtejshme për qëndrën rinore, kjo mund të bëhet realitet.
Shumë shpejt, do të kalojmë këtë nismë ligjore në Parlament, dhe besoj që së shpejti të rinjtë që kanë ide të bukura nuk do të mbeten vetëm me ide, por do të kenë mundësinë t’i realizojnë ato vetë dhe të bëhen realitet.
Për të gjithë ata të rinj që janë të talentuar dhe unë e di që ne kemi shumë fitues olimpiadash dhe kompeticionesh nga qyteti i Burrelit. Dua të theksoj se, që nga mesi i këtij viti, për të gjithë ju që do të fitoni këto kompeticione, do të ofrojmë jo vetëm shpërblime, por gjithashtu mbështetje për t’ju motivuar më tej. Po ashtu, për ata që do të përfaqësojnë vendin tonë jashtë Shqipërisë, përmes Agjencisë Kombëtare të Rinisë, do të mbështesim kostot e udhëtimit dhe të pjesëmarrjes atje.
Kështu, nuk do t’u kërkoni më prindërve mbështetje financiare për arritjet tuaja profesionale dhe arsimore, por do të keni mundësinë të mbështeteni nga Agjencia Kombëtare e Rinisë.
Të gjitha këto projekte vijnë si rezultat i angazhimit të të rinjve. Besoj se, duke i pasur ata pjesë të politikave tona, është mënyra më e mirë që të jemi afër jush. E di që kërkesat janë të shumta dhe kjo është arsyeja pse kemi krijuar një Këshill Vendor Rinor. Por, duke pasur një kryetar bashkie që vërtet e ka rininë në qendër të vëmendjes, atëherë projektet dhe idetë tuaja patjetër që mund të marrin rrugë drejt realizimit, sigurisht me punë dhe përpjekje nga të gjithë ne.
Punët e mira nuk bëhen shpejt, por bëhen me vizion të qartë dhe objektiva të vendosura për t’i realizuar. Besoj se sot është dita për të thënë se një detyrë e mirë është bërë. Patjetër, shumë detyra të tjera të mira na presin. Me ndihmën e të gjithë ekipit këtu në Burrel, do të ecim përpara dhe do të realizojmë edhe shumë projekte të mira për të rinjtë. Besoj fort se të rinjtë e Burrelit janë shumë të talentuar dhe meritojnë çdo mbështetje të mundshme nga ana jonë, për t’u bërë më të arrirë profesionalisht dhe për t’u dalluar në çdo fushë të jetës, qoftë në art, kulturë, sport, edhe sigurisht në pjesën mësimore, dhe patjetër që ju e meritoni edhe këtë investim.
Ta gëzoni, përdoreni sa më shumë dhe mbi të gjitha, mos e lini asnjë ditë bosh!
Shumë faleminderit!