Published on: 27/05/2025
Aktiviteti përmbyllës i projektit pilot “Fibsat”, Muzhaqi: “Projekte inovative në edukimin financiar për fuqizimin e të rinjve”
Nxënësit e shkollës “Dhaskal Todri” dhe shkollës “Teknike Ekonomike Tiranë” zhvilluan aktivitetin përmbyllës të projektit “Fibsat”. Falë kësaj nisme, rreth 60 të rinj mësuan sesi të menaxhojnë financat e tyre, madje edhe duke investuar online. Përmes aplikacionit, të rinjtë patën mundësi të kursejnë, të investojnë në portofolin e tyre digjital dhe të mësojnë nga video dhe pyetësorë të ndërtuar në mënyrë tërheqëse, si edhe të shpërblehen për notat e mira.
Në afro 90% të rasteve, nxënësit zgjodhën të investojnë në llogari kursimi, përkundrejt mundësive që ofron aplikacioni me investime si aksione në Apple dhe Bitcoin. Edhe pse patën mundësi të tërhiqnin fitimet e tyre në gjysmën e programit, të rinjtë zgjodhën të vazhdojnë – një tregues i qartë i vlerës që kjo përvojë pati për zhvillimin e tyre personal.
Ministri i Shtetit për Rininë dhe Fëmijët, znj. Bora Muzhaqi, mori pjesë në ceremoninë përmbyllëse të këtij projekti, i cili në thelb është një tjetër nismë që synon fuqizimin e të rinjve dhe pajisjen e tyre me aftësi që do t’u shërbejnë gjatë gjithë jetës. Projekte inovative që kanë në fokus edukimin financiar të të rinjve janë të një rëndësie specifike për qeverinë shqiptare.
“Në një Shqipëri që po ecën me hapa të shpejtë drejt digjitalizimit të shërbimeve publike, është thelbësore që fëmijët dhe të rinjtë të mësojnë të përdorin sisteme të reja financiare, të cilat do të reduktojnë përdorimin e parasë cash dhe do të inkurajojnë përdorimin e aplikacioneve për transaksione”, u shpreh ministrja Muzhaqi.
Kjo nismë tregoi se risitë përmes digjitalizimit në edukimin financiar sjellin rezultate konkrete kur ndërthuren me përvojën, vendimmarrjen dhe shpërblimin real. Modeli i suksesshëm i pilotuar nga Fibank Albania, që lidh arritjet shkollore të nxënësve me një platformë bankare interaktive, ofron një qasje inovatore dhe praktike për edukimin financiar në Shqipëri. Ky model krijon bazën për një sistem të integruar ku nxënësit jo vetëm mësojnë teorikisht, por edhe praktikojnë menaxhimin e parave përmes monedhave virtuale të konvertueshme.
Edukimi financiar është thelbësor për t’i ndihmuar të rinjtë të ndërtojnë një marrëdhënie të qëndrueshme me financat që në moshë të hershme. Duke mësuar për kursimet, menaxhimin e parasë dhe shpenzimet, ata bëhen më të përgjegjshëm dhe të ndërgjegjshëm për vendimet financiare që ndikojnë të ardhmen e tyre. Kjo i ndihmon të shmangin vështirësitë ekonomike dhe të zhvillojnë strategji të qëndrueshme financiare.